Thursday, September 8, 2022

PATHIAN MALSAWMNA RAHBI PALI

 Kohna mila Nun: Eng vangin nge khawvelah hian ka lo pian ve?  

By Rick Warren

— Sept 8, 2022 


“Mal ka sâwm ang che a, …, malsâwmna i ni ang." [Genesis 12:2] 

Ringtu tam berte chuan an thilpek leh thil neih hmanga midangte tana malsawmna thlen chu an duh a. Mahse duhna mai a ni. Pathian chuan midangte tana malsawmna ni turin thupek min pe a, a chhan chu nangmah ngei kha malsawmna dawngtu i ni. 

Midang tana malsawmna nih tuma i inkau mek lai khan, Pathian malsawmna hnathawh kawng liin ngaihtuah ang che: 

1.*I malsawmna chu mite hnenah luang chhuak rawh se.* 

Bible-in min zirtir dan chuan, malsawmna i dawn chhan chu nuam i tih nan emaw i hlim a, nuam i tihna mai tur a ni lo. Malsawmna i dawn chhan chu, midangte tan malsawmna i nihna tur a ni. Pathian chuan, Genesis 12:2-ah chuan Abrahama hnenah hetiang hian a sawi, “Mal ka sâwm ang che a, …, malsâwmna i ni ang," tiin. Hei hi malsawmna nunpui dan hmasa ber a ni; Pawn lamah a luang chhuak tur a ni. 

2.*Midang tana malsawmna i nih chuan Pathianin i mamawhte a pe che.* 

Midangte tanpui duh ngawih ngawihtu chu, Pathian pawhin a lakah ui a nei ngai hauh lo. Dik tak chuan, Pathian a intiamkam dan chuan midangte malsawm tuma i insawrbing ngat chuan i mamawhte a pek ve ang che. 

Luka 18: 29-30-ah chuan Isuan hetiangin a sawi,  “Thu dik ka hrilh a che u, Pathian ram avânga in emaw, nupui emaw, unaute emaw, nu leh pa emaw, fate emaw kalsan tawh phawt chuan, tûnah ngei pawh hian, a aia tam daih an hmu ngei ang, hun lo la thleng tûra chatuan nunna nên,” tiin. 

Midangte ṭanpui tura i rilru i buatsaih a nih chuan, Pathian chuan i mamawhte chu a phuhru ve thung ang. Chu chu malsawmna dik tak chu a ni – a chhan chu i buaina chingfel tur chuan nangmah ai chuan Amah chu a rintlak zawk fe a ni.  

3. *Midangte tana malsawmna i pek chhuah chu a lo la let leh dawn.* 

Midangte tana i luan chhuah tam a, mite i ṭanpui nasat poh leh Pathian malsawmna i dawng nasa ang. Luka 6: 38 chuan hetiang hian a sawi, “Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang,” tiin. 


Pathian chu i hneh ban thei lovang. Midangte tana i luan chhuah nasat poh leh Pathian chuan “Ka malsawmna chu nasa zawkin ka vur dawn che. Infiamna chu i ṭan ang hmiang. Tu nge chak zawk dawn, i en ang hmiang. Tu nge pe chhuak tam zawk zawk en ila. Midangte tana i pek tam poh leh a aia tamin ka vur ve dawn che,” tiin a sawi. 

4. *Pathianin malsawmna a vur tam poh che leh mite tan tam zawka inhmang turin a duh che.* 

Isua chuan Luka 12: 48-ah hetiang hian a sawi, “Amaherawhchu, hriat loh avânga hremna khawp thil ti chu nêp deuhva vuak an ni ang. Tam tak an pêk apiangte lakah chuan tam tak an phût ang, tam tak an kawltîr apiangte lakah tam tak an beisei ang,” tiin. 

Pathian malsawmna sem chhuah chu inthlahrung ngai suh. Pathian aṭanga i thilpek dawn i sem nasat poh leh Pathian chuan tam zawkin a rawn vur let ang che. 

Ngaihtuah zui atan. 

Pathian aṭanga malsawmna i dawn tawhte chu ngaihtuah nawn teh. Eng ber kha nge midangte i lo sem ve tawh? 

Pathianin malsawmna a lo vur tawh che mil khan eng ang chiahin nge midangte tana luang chhuak ve turin Pathian chuan a duh ang che? 

Midangte tana malsawmna ni turin vawiin hian engtin nge i chet chhuah ang? 

*Pathian hmangaihna emaw vanram emaw chu i thawhchhuah a ngai lo.* 

Bible chuan hetiang hian a sawi, “Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni; thiltih avâng a ni lo ve; chuti lo chuan, miin an chhuang dah ang e,” tiin [Ephesi 2: 8-9] 

Amaha tlu lut tura thutlukna i siam thei a nih chuan, he ṭawngṭaina hmang hian inhlan ang che: 

“Lalpa duhtak, misual ka ni tih ka hria a, i ngaihdamna ka rawn dil a che. Isua Krista chu i Fapa a ni tih ka pawm a. Ka sualte avangin a thi a, nangmahin nunna nei turin i kaitho leh tih ka ring e. Ka chhandamtu atana pawmin ka Lal anga zui ka duh e, vawiin aṭang ngei hian. Ka nun hi hruai la, i duh zawng anga nung turin min pui rawh. Isua hmingin ka dil e. Amen.” 

He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...